SAMBA BILALANG

Oleh : Ade Putra

Di kampuang ambo, Bilalang samba nan paliang lamak. Katiko urang lah musim ka sawah atau urang alah siap panen, banyak induak - induak pai mancakau bilalang dimalam hari. Mamakai lampu togok jo plastik.

Kalau banyak dapek bilalang, salain untuk dimakan surang atau keluarga, sabagaian lai dijua. Haragonyo lumayan maha dunsanak, satekong bareh tu bisa Rp. 5000 - 10.000. Manuruik urang tuo - tuo, ruponyo khasiat Bilalang ko banyak, salah satu e bagi induak - induak yang baru malahian, kalau bisa makan samba bilalang, rancak untuak manambah aia susu. Olahan bilalang ko banyak dunsanak, bisa digoreng, bisa digulai, paliang lamak tu dibuek randang dunsanak, campua jo pucuak ubi. Ondeeh....yo sabana sero. Masih takana dek ambo, wakatu kuliah, kawan ambo dapek kiriman dari amaknyo di kampuang, samba randang bilalang.

Sabananyo ambo indak suko samba bilalang. Sajak ketek sampai alah tamat kuliahpun, ambo jarang makan samba bilalang. Di rumah amak sakali - sakali lo mambuek e nyo. Dek kami marantau, jadi Bilalang ko jarang dibuek urang untuak samba. Makonyo ambo ndak suko samba bilalang ko.

Cuma patang - patang ko ambo mancubo, kironyo lamak juo. Walaupun ambo ndak banyak makannyo. Kecek amak ambo, kalau lah di kampuang ko, awak harus suko samba bilalang, itu pasan amak.

Dalam al qur'an ruponyo alah disabuik an, " bangkai nan elok dimakan ado duo. Bangkai ikan dan Bilalang ". Baa di kampuang dunsanak, apo ado urang yang mambuek samba bilalang. Atau dunsanak lai suko jo samba bilalang?

#manulih hari ka 180

#Platinum

Dharmasraya, 13 juli 2020